Inkesta
Ondoko lerroetan 2016an Ollarango biztanleei egindako inkestaren berri eman behar dugu. 111 lagunek erantzun zuten (biztanleriaren %25). Partze-hartze hori hobetu daiteke, noski, baina nahikoa dela iruditzen zaigu. Mila esker denoi!
Udal eta kontzejuei buruzko iritzia
Inkestatzaileen erdiak (%55) ez dute parte hartzen kontzejuen bileretan, denborarik ez dutelako, edo ez dakitelako noiz diren. Nabarmentzekoa da heren batek ez dakiela zein diren kontzejuen eskumenak eta lanak. Gehienek ez dizkiete eskumenak murriztu nahi, hala ere, %12k (14 lagun) uste dute eskumen gutxiago izan behar dutela, adibidez obra-baimenen kudeaketa. Kontrara, 19 lagunek lan eta gaitasun gehiago emango liekete kontzejuei: hirigintza, zergak, dirua…Erdiek uste dute kontzejuen baliabideak hobeki erabili ahal direla, tartean diru gehiago eta kudeaketa hobea badaude. Batez besteko balorazioa 5 puntukoa da. Hala ere, kontzeju batetik bestera alde handiak daude (1etik 8ra)
Udalaren eta beraren langileen arreta ongi baloratzen dira, batez ere administrariarena. %40 euskarazko arreta nahiko luke. Zerbitzu guztiek 7ko nota dute, 0-3 urteko diru-laguntza eta web orria izan ezik (4ko eta 5eko notak, hurrenez hurren).
Ondarea berreskuratzeko ahaleginak ere ongi ikusi dira: Garañoko gaztelua (6ko nota), Donamariako baseliza (5) eta Ondare ez-materiala (zaharrei egindako inkestak) (7).
Taxi zerbitzua ez da ia-ia erabiltzen.
Auzokideen arteko harremanak
Auzokideen arteko harremanak onak dira %70entzat, batez ere herri bereko auzokideen artean. Erdiek beste herrietako jardueretan parte hartzen dute. 24 lagunek nahiko lukete kirol talderen bat izatea; beste 24k, antzerki talde bat; 19k, irakurketa taldea; 16k, emakumeen elkartea, eta beste 12k erraldoi eta kilikien konpartsa nahiko lukete.
Gehienek (%70) uste dute ona dela bailaran biztanle gehiago izatea, batez ere gazteak badira.
Espazio publikoak
Erdiek gaizki ikusten dute herrietako sarbideak, estuak direlako autoak eta autobusak pasatzeko. Gainera, aparkalekuak behar direla uste dute. Horretaz gain, herri eta baliabidearen arabera balorazioak ere ezberdinak dira.
Telekomunikazioak
Internet erabiltzen dute egunero %67k, eta telefono mugikorra %72k.
38 lagunentzat lanerako ezinbestekoa da internet.
Festak, aisialdia, jarduerak
Erdiek parte hartu dute bailarako festetan (Ollarango eguna, Olentzero eta Euskararen eguna) eta ongi iruditzen zaizkie. Festa egun horietan ez dute beharrezkoa ikusten garraio publikoa jartzea.
Gehienek uste dute festa horiek antolatu behar dituztela horretarako prest dauden herriek; hala ere, %36k uste dute herri guztietan antolatu behar direla, txandaka. Bestalde argi dago ez dagoela modurik edo interesik herrien artean beste jarduerarik egiteko.
Jubilatuak
17 jubilatuk erantzun diote inkestari, eta bakarrik 7 dira jubilatuen elkarteko bazkide. Horietako 6k parte hartzen dute elkartean. Ongi ikusiko lukete udalak kluba pixka bat mugituko balu, besteek ez dakite. Oro har, ez dute jantoki zerbitzurik nahi.
Lana eta familia uztartzeko politikak
Ia erdiek eskatzen dute lana eta familia uztartzeko neurriak ezartzea, batez ere ludotekak, haurtzaindegiak…
Etxebizitza premia
Laurden batek uste du etxebizitza premia badela, beste laurden batek ez du hori uste. Etxerik ez dutenek nahiko lukete etxea izan baratzarekin.
Ekimen ekonomikoa
17 lagunek (%15) nahiko lukete zerbait egin edo abiatu bailaran: turismoa eta ostalaritza (6), abeltzaintza (4), artisautza (3), osasungintza edo pertsonen zaintza (3), merkataritza (2), hezkuntza (2) edo garraioa (2).
Horietatik 14k nahiko lukete udalak laguntzea ekimen horiek garatzeko. Horretarako udalari eskatzen dizkiote diru-laguntzak, telefono estaldura ona eta lur-eremuak eta azpiegiturak salgai edo alokairuan.
24 pertsonak (%20) denbora-bankuan parte hartuko lukete.
Etorkizunerako proiektuak, asmoak
Proposatutako proiektuak kontzejuen arabera ordenatuta honakoak nahiko lukete, lehentasunaren arabera:
Telekomunikazioak hobetzea: telefonia, Internet, telebista. Kontzeju guztietan batean izan ezik, lehenengo aukera da.
Ollarango kultur ondarea berreskuratzea: garbitokiak, zubiak, iturriak, baselizak… Bigarren aukera da.
Hirugarren aukera, bigarrenetik oso hurbil, natur ondarea txukuntzea eta seinaleztatzea (bideak, ardi-bideak.
Laugarren tokian, erabilera anitzeko lokal bat izatea (wifi).
Eta azkenik, Anotzeko meategiaren inguruan bainatzeko eremua izatea.
10.000 € izanez gero, zertarako erabiliko luketen galdetuta, hauek erantzun dituzte gehienek:
Bi langile kontratatzea lorezaintzan eta obretan aritzeko (38 erantzun)
Gazteendako lokal bat prestatzeko (22)
Herrietako sarbideak eta aparkalekuak atontzeko (19)
Turismoa sustatzeko (18)
Ondarea seinaleztatzeko (18)
Herrikoendako jarduerak eta ikastaroak antolatzeko (17)
Gazteak
26 gaztek erantzun dute, batez ere Ollo, Egillor eta Ultzurrunekoak dira, euskara eta ingelesa dakite eta batxilerra edo goi mailako ikasketak egin dituzte. Internet eta telefonoa maiz erabiltzen dute. Erdiek ez dute inoiz lanik egin. Eta beste erdiek noizbehinka zerbitzuetan edo arautu gabeko ekonomian. Nahiko lukete gaztetxe bat izan, beren herrian izanez gero, edo garraioa izango balute.
Gehien eskatutako gauzak: igerilekua, gimnasio edo kiroldegia. Dantza, antzerkia, margoa…egiteko areto bat. Beste eskari batzuk: diskoteka, interneteko lokala, txaranga, ur-lasterren kainona, garraio publikoa, merkatalgunea… herrietako festetan komunak, ordu guztietan taxia.
Ideia-ekaitza!!
Anotz
“Ibai bazterrak garbitu behar dira, zaborra eta sasiak kendu. Anotzeko errota hondaturik dago eta erortzeko arriskua du”.
Arteta
“Nahiko nuke udalak zerbitzu garbia eta zintzoa ematea, ezer ezkutatu gabe. Gardentasuna.”
Beasoain-Egillor
-Garraio publikoa sustatu behar da.
– Aisialdirako jarduerak diruz laguntzea: ludoteka, ondoko herrietako kirol jarduerak (Oltza, Irurtzun)
– Energia berriztagarriei lehentasuna ematea argindarraren kontratuetan, auzokideen artean horiek erabiltzeko kanpainak egitea.
– Elizaren jabegoa lortzea, eta bitartean, beste ekitaldi batzuk egiteko erabiltzea: kontzertuak, hitzaldiak, yoga, antzerkia, erakusketak…
– Wi-Max sistema zentralizatua jartzea. 3G eta 4G telefono estaldura zabaltzea.
– Berokuntza eta lorezaintzako lanabesak partekatzeko sistema ezartzea.
– Hirigintzako garapena antolatu eta, behar izanez gero, araudia egokitu; eta ikusi zein garapen behar den landa-bizimodua garai hauetan mantentzeko.
– Artetako gatzagak berreskuratzea.
Iltzarbe
-Udalaren web orria berritzea. Eta bertan kontsultatu ahal izatea udal batzarreko aktak, instantziak egin, bailarako ibilbideak…
Ollo
– Gazte eta helduen arteko ateraldiak antolatzea, herrien arteko jendearen parte hartzea eta interakzioa bultzatzea.
– Kexa bat udako ludotekari buruz, gaztelania askotan erabiltzen delako.
– Lan anitzetako langile gaitu bat urte osoan kontratatzeko eskaera
Saldise
– Herri lurren kudeaketa integrala, larreak erabiltzeko alokairua eta epaitzak baino gehiago. Bailara osoko herri lurren kudeaketa integrala gestoria baten bidez, kontratu baten bidez.
Senosiain
– Ollarango kultur ekimenak bultzatzea. Aisialdirako eskaintza gehiago izatea, eta ez bakarrik festak (Olentzero, Ollarango eguna…)
– Musika eskola sortzea.
Ultzurrun
– Ororbiatik datorren errepidea hobetzeko eskaera egitea Nafarroako Gobernuari.
– Artetako Belnature egoitza lortzea, ondoren taldeei edo elkarteei uzteko edo alokatzeko.
– Eremu bat izatea jarduera ezberdinak egiteko: kirola, aisialdia, formakuntza…
